ആത്മാവിനെ കണ്ടവരുണ്ടോ?

ആത്മാവ് എന്നൊന്നില്ലെന്നും, നമ്മുടെ ചിന്തകളും, വികാരങ്ങളും, ബോധവുമെല്ലാം മസ്തിഷ്കത്തിൻ്റെ മാത്രം നിർമിതികളാണെന്നും, നമ്മൾ എന്ന് പറയുന്നത് കേവലം നമ്മുടെ മസ്തിഷ്കം മാത്രമാണ് എന്നൊക്കയാണ്    നാസ്തിക ഭൗതിക വാദികളുടെ വാദം. തലച്ചോറിലെ എല്ലാ ഭാഗങ്ങളും ഉണർന്ന് പ്രവർത്തന സജ്ജമായിരിക്കുന്ന അവസ്ഥയാണ് നമ്മുടെ ബോധം, അത് കൊണ്ടാണ് ഉറക്കിൽ നിന്നെണീക്കുമ്പോൾ ബോധത്തിലേക്ക് വരാൻ കുറച്ച് സമയമെടുക്കുന്നത്. തലച്ചോറിന് അപകടം സംഭവിച്ചവരുടെ സ്വഭാവവത്തിലും വ്യക്തിത്വത്തിലും വരുന്ന മാറ്റങ്ങൾ, ഓർമശക്തി നഷ്ടപ്പെടുക തുടങ്ങിയവയൊക്കെ അത് കൊണ്ടാണ്. ആത്മാവെന്നത് കേവലം മത, സാഹിത്യ സങ്കല്പമാണ് അങ്ങനെ പോകുന്നു നാസ്തിക വാദങ്ങൾ.

പ്രത്യക്ഷത്തിൽ നോക്കിയാൽ പറഞ്ഞതെല്ലാം ന്യായമാണെന്ന് തോന്നും. ശരീരത്തിൻ്റെ പ്രവർത്തനങ്ങളുടെ മൊത്തം നിയന്ത്രണകേന്ദ്രം മസ്തിഷ്കമാണെന്നുള്ളത് ശരിയാണ്. നമ്മുടെ ആന്തരിക അവയവങ്ങളുടെ പ്രവർത്തനം മസ്തിഷ്‌കം സ്വയം ചെയ്യുന്നതാണ്, നമുക്കതിൽ നിയന്ത്രണമൊന്നുമില്ല. നിത്യ ജീവിതത്തിൽ നമ്മൾ ചെയ്യുന്ന പല കാര്യങ്ങളും ബോധപൂർവമല്ലാതെ സ്വാഭാവികമായി, യാന്ത്രികമായി മസ്തിഷ്‌കം ചെയ്യുന്നതാണ്, പക്ഷേ ഒരു പ്രശ്നമുണ്ട്! അവയെ നമ്മുക്ക് വേണമെങ്കിൽ ബോധപൂർവം തടസ്സപ്പെടുത്താം. ചില കാര്യങ്ങൾ നമ്മൾ പൂർണ്ണ മനസ്സോടെ ബോധപൂർവം ചെയ്യുന്നതുമാണ്. 

നമുക്ക് എന്തിനെക്കുറിച്ചെങ്കിലും ചിന്തിക്കണമെങ്കിൽ ചിന്തിച്ച്‌ ഒരു തീരുമാനമുണ്ടാക്കിത്തരും. നമുക്ക് എന്തെങ്കിലും ചെയ്യണമെന്ന് തോന്നുമ്പോൾ മസ്തിഷ്‌കം അതിനനുസരിച്ച സിഗ്‌നൽസ് അവയവങ്ങളിലേക്കയക്കുന്നത് കൊണ്ടാണ് നമുക്കത് ചെയ്യാൻ കഴിയുന്നത്. ആരെങ്കിലും എന്തെങ്കിലും ചോദിച്ചാൽ മസ്തിഷ്കം ഓടിപ്പോയി ശരിയായ ഉത്തരവുമെടുത്ത് വരും, അപ്പൊ വേറെയാരോ ഇടപ്പെട്ട്, അതിപ്പോ വേണ്ട, അവിടത്തന്നെ കൊണ്ട് പോയിവച്ചെക്കെന്ന് പറഞ്ഞ് കളവ് പറയിപ്പിക്കും. ചൂടുള്ളതിൽ തൊട്ടാൽ പൊള്ളുമെന്നും തൊടരുതെന്നും അറിയുന്ന മസ്തിഷ്ക്കത്തെ കൊണ്ട് തന്നെ ചിലർ സ്വന്തം ശരീരത്തിൽ പെട്രോളൊഴിപ്പിച്ച്‌ തീ കൊളുത്തി ആത്‍മഹത്യ ചെയ്യിപ്പിക്കും. ഈ തീരുമാനങ്ങളെല്ലാം മസ്തിഷ്‌കം സ്വയമെടുക്കുന്നതാണോ? കേവലം മസ്തിഷക രാസപ്രവർത്തങ്ങളുടെ ഫലമാണോ നമ്മുടെ ചിന്തകളും പ്രവർത്തികളും? ഒരിക്കലുമല്ല, ഇതെല്ലം നമ്മളെടുക്കുന്ന തീരുമാനങ്ങളാണ്. നമ്മുടെ മനസ്സ് പറയുന്നതനുസരിക്കുക മാത്രമാണ് മസ്തിഷ്കം ചെയ്യുന്നത്. നമുക്കിതൊക്കെ ചെയ്യാതിരിക്കുകയോ മാറ്റുകയോ ഒക്കെ ചെയ്യാം. നമ്മുടെ ചിന്തകളിലും പ്രവർത്തികളിലും നമുക്ക് നിയന്ത്രണമില്ലാത്ത, അതിലൊന്നും നമുക്ക് ഒരുത്തരവാദിത്വവുമില്ലാത്ത ഒരു ലോകത്തെകുറിച്ച് ചിന്തിച്ച്‌ നോക്കിയിട്ടുണ്ടോ? ഇതെല്ലം മസ്തിഷ്‌കം സ്വയം ചെയ്യുന്നതാണെങ്കിൽ, നാളെ മസ്തിഷ്‌കം എന്ത് ചെയ്യുമെന്ന് അറിയില്ലെങ്കിൽ നമുക്ക് എന്തെങ്കിലും മുൻകൂട്ടി തീരുമാനിക്കാൻ കഴിയുമോ? നമ്മൾ ആരെയെങ്കിലും വിശ്വസിക്കുമോ? നമ്മളെയാരെങ്കിലും വിശ്വസിക്കുമോ? അപ്പൊ ഇടക്ക് നമ്മുടെ മസ്തിഷ്കത്തെ നിയന്ത്രിക്കുന്ന ആ നമ്മൾ എവിടെയാണ്?

നാസ്തികർ ഇതെല്ലം മസ്തിഷ്‌കം തന്നെ ചെയ്യുന്നതാണെന്നെക്കെ പറയും. അത്രകാര്യമാക്കേണ്ട, വാക്കുകളിലും പ്രവർത്തിയിലും “ചിന്തയും”, “യുക്തിയും” ബാധകമല്ലാത്തത് കൊണ്ട് അവർക്കെന്തും പറയാം. ഇതൊക്കെ പേരിലെങ്കിലും ഉണ്ടായിക്കോട്ടെ എന്ന് കരുതിയാവണമവർ പേരിനോടോപ്പം “ചിന്ത”, “യുക്തി” എന്നൊക്കെ കൊണ്ട് നടക്കുന്നത്. നാസ്തികരുടെ ചിന്തകളും പ്രവർത്തികളും മസ്തിഷ്‌കം സ്വന്തമായി ചെയ്യുന്നതാണെകിൽ തലച്ചോറിലെ രാസപ്രവർത്തനങ്ങൾ ഒരിഞ്ച് അങ്ങോട്ടോ ഇങ്ങോട്ടോ മാറിയാൽ നാളെയവർ വേറെ എന്തെങ്കിലുമൊക്കെ പറയും. ഇതൊക്കെ വിശ്വസിച്ചു നടക്കുന്ന നമ്മൾ മൂഞ്ചനസ്തരാവുകയും ചെയ്യും. അത് കൊണ്ട് നമുക്ക് ശാസ്ത്രം എന്തെങ്കിലും പറയുന്നുണ്ടോ എന്ന് നോക്കാം.